Prome Minister Eman den panel di Blue Guardian na COP21
ORANJESTAD – Durante e Conferencia Climatico COP21 cu a tuma luga na Paris, Clinton Foundation a organisa un evento unda a presenta e trabou cu ta wordo haci door di Blue Guardians titula “Protecting Oceans and Enabling Blue Economics”. Mirando e rol di Prome Minister di Aruba Mike Eman den e lucha di nacionnan isleño cu ta wordo perhudica cu cambio climatico, e tabata invita pa hiba palabra.
Blue Guardians ta un “partnership” estableci door di Gobiernonan di “Small Island Developing States”(SIDS) via di SIDS DOCK, un iniciativa di energia renobabel cu ta conecta e sector di energia den SIDS cu e mercado global pa financiamento.
E “partnership” ta inclui tecnologia moderno di sector priva y proveedornan di data, incluyendo DigitalGlobe, “Clinton Climate Initiative” ta un nitiativa di Clinton Foundation: un organisacion di desaroyo multi-lateral, incluyendo World Bank y NGO-nan di conservacion manera Conservation International, The Nature Conservancy y GRID-Arendal.
Den presencia di representante di tur e organisacionnan aki Prome Minister Eman a hiba palabra unda cu el a wordo introduci como un persona hopi popular y “a wonderfull channel of voice for the Caribbean region within the Kingdom ….”
E mandatario a expresa e gran placer cu e ta sinti di ta presente den nomber di Reino Hulandes y Aruba. “Hulanda sigur tin hopi experiencia di awa si mira cu un 26% di e pais ta bou nivel di lama y 60% di e pais ta den constante menasa di wordo inunda. Pues awa ta parti di nos existencia,” Eman a splica.
Aruba a participa den e Conferencia di Cambio Climatico ya cu e tin un ‘green agenda’ cu Aruba ta implementando desde fin di 2009. “Aruba ta enfocando pa ta 100% sostenibel pa 2020. Ya caba 30% di nos capacidad di energia ta wordo produci door di sistema renobabel di biento, solar, waste to gas. Pa final di otro aña nos lo yega na 50% di nos produccion di energia renobabel y bayendo pa e momento cu nos ta depende solamente riba energia renobabel.”
Den tur e temanan discuti, e mandatario a bisa, e enfoke importante ta riba nos lamanan. “Hopi hende no ta realisa cu un gran cantidad di nos alimento ta bin di lama y 50% di nos oxigeno ta bin di lama, y hopi di exceso cu ‘global warming’ ta produci ta wordo absorba door di lama. Pesey e lama ta crucial pa nos existencia.”
No solamente pa cuminda, Eman a splica, pero tambe pa e islanan cu ta depende di turismo, cu tin beachnan bunita y hotelnan construi na e costa, lama ta hopi importante. “Pesey cu nos amigo Blue Guardian, cu ta yuda nos colecta informacion di loke ta pasando cu nos lamanan, ta midi e cambionan den lama, ta di crucial importancia,” e mandatario a bisa y a pidi aplauso pa e organisacion aki y tambe pa Clinton Foundation.
Na final e mandatario a bisa di ta hopi agradecido di por ta trahando cu e organisacionnan aki y otronan manera Carbon War Room, Rocky Mountain Institute y UN. “E ultimo aki a dicidi di institui un Centro di Excelencia na Aruba. Un centro unda cu mundo completo tin acceso na dje y cu ta contene data riba tur loke ta wordo haci riba tereno di energia renobabel. “Den e proximo añanan nos ta conectando e ambicion pa crea un economia berde den un ‘blue economy’. E desaroyo di nos como isla chikito ta brinda oportunidad grandi pa haci e transicion exitoso pa nos mes pero tin tambe e gran responsabilidad pa hacie den forma di un “living lab”. Tur experiencia acumula pa protega e lama rond di nos isla of haci e conversion pa energia sostenibel mester ta disponibel pa paisnan grandi y transparente den cada paso cu nos tuma y traha cu institucionnan cu por plama e informacion rond mundo.
Informacion di transicion di Aruba pa energia sostenibel ta disponibel pa mundo
