ORANJESTAD (AAN): Pa mas of menos 4’or y 50 di marduga, Central di Polis a manda patruyanan cu poco urgencia na Olde Molen.
Pa ora patruyanan a yega, ya e dos personanan cu a wordo tira a bandona e sitio den un auto particular cu a hiba nan hospital ya cu no por a warda riba yegada di ambulance.
Polis a wordo informa cu un hende homber a wordo tira den garganta y e otro suspuestamente den pecho.
Di biaha a start un investigacion grandi na e sitio pa determina kico a pasa.
Polis a cera e area debi cu tabatin pechi y sapato cu a keda atras, y a busca tambe posibel huls. E sospechoso cu ya ta conoci pa husticia a bandona e sitio caba pa ora polisnan a yega.
Despues cu e Polisnan tabata na Olde Molen nan a presenta na Riu Antillas pa a bay busca mas informe debi cu turistanan a yega na e Hotel y informa cu nan a keda bati door di grupo di persona den e luga.
Durante e interogacion na e hotel cerca e turistanan polis por a conclui cu e sospecho cu a los tiro den Olde Molen lo tabata buscando problema cu tur hende y aki a start un pelea paden. Dos persona di seguridad a trata na para e pelea segun a wordo comunica y aki e bouncer lo tabata tin confrontacion cu un sospechoso cu a saca arma di candela y tira heridando dos persona di cualnan un a fayece na hospital.
E bouncer cu a fayece ta Aldwin Damian miho conoci como Bongo.
Polis a haci su investigacion y a bin resulta auto A-59626 lo ta e auto cu tabata tin e personanan den dje cu mester a tira riba e personanan aki na Olde Molen.
Despues cu polis a caba di interoga tur testigo na hospital, nan a wordo dirigi na Riu Antillas, caminda tabata tin tres otro persona cu tambe tabata envolvi den e pelea aki, di cual un di nan a wordo bati.
Na yegada di polis na Riu Antillas a bin tende cu en verdad un di e personanan ta hopi herida y patruya di polis mes mester a transporte pa hospital pa e wordo trata debi na e golpinan cu el a haya.
Den careda di 5’or y 20 di marduga polis a cera full e area di The Mill Night Club pa haci nan investigacion y ademas a cuminza busca e tirador.
E di dos persona tabata den Cuido Intensivo ayera.
A tira bouncer Bongo mata pafo di Olde Molen
