KOMUNIKADO DI KUERPO POLISIAL KÒRSOU: Tiramentu ku morto
WILLEMSTAD, Curacao — Djaluna 28 desèmber 2015, alrededor di 03.45’or mardugá, Sentral di Polis a risibí informashon ku na Blanquillaweg un kaso di tiramentu ku herido a kaba di tuma lugá.
E unidat polisial ku a bai na e sitio a topa ku un outo pará den e kaya ariba menshoná ku basta perforashon di bala i un hòmber ku no ta duna señal di bida.
For di un investigashon preliminar ku polis a realisá na e sitio a resultá ku un outo ku 3 okupante aden, dos hòmber i un mucha muhé menor di edat, a bai baha un di e okupantenan na kas den Blanquillaweg ora ku direpente 3 hòmber ku arma di kandela a sorprendé nan i lòs un kantidat di bala riba nan.
E okupante di e outo, K.M., di 21 aña di edat, a risibí herida di bala i a logra di sali for di e vehíkulo i kore bai for di e sitio en buska di ayudo den besindario . Shofùr di e outo a konsekuensia di e heridanan di bala a bin fayesé na e sitio.
Dòkter di polis a konstatá morto di e hòmber, Luigino Victoriano Martina, (Small V) nasé na Kòrsou 23 di mart 1987. Riba òrdu di fiskal di Ministerio Públiko a konfiská e kurpa sin bida di e víktima pa mas investigashon.
Riba F.D. Rooseveltweg ambulans a bin topa ku e víktima K.M. i a transport’é pa poliklínika na unda despues di risibí tratamentu médiko el a keda interná den hospital St. Elisabeth.
E mucha menor di edat ku tabata sintá patras den e vehíkulo a sali ileso for di e tiroteo aki. E investigashon den e kaso aki ta kontinuá.
Rapper yui di korsou “Small v” asesina den Blanquillaweg
