WILLEMSTAD, Curacao — Manera ya kaba ta konosí, dia 6 di mart 2015 tabatin un atrako armá na un kompania riba tereno di Zona Franca banda di aeropuerto Hato. Ta trata aki di un atrako kometé pa mas o ménos 5 hòmber ku a yega na e negoshi ku kara maskará i tur kompletamente armá.
Tur e 5 hòmbernan aki tabata bistí den trahe di kamuflahe. Algun ratu promé ku e atrako tuma lugá, dos personal di Servisio Pan Americano a yega na e sitio pa rekohé algun bara di oro.
Despues ku e personal aki a drenta e edifisio, e grupo di hòmbernan tambe a logra penetrá i una bes paden, a surgi un interkambio di tiru entre e personal di Pan Americano i e sospechosonan, ku konsekuensia ku un di e trahadónan di Servisio Pan Americano a bin pèrdè su bida, miéntras ku e otro a keda heridá.
Despues di nan akto e atrakadónan a move na pia for di e sitio ku un botin di 8,2 kilo di oro. Den kuadro di e investigashon ku ta realisando den e kaso aki, Ministerio Públiko a pone un suma di 10.000 florin disponibel pa informashon ku por kondusí na detenshon di e siguiente dos sospechosonan, kendenan ta Jainmore alias “Jay” Winklaar i Thuran alias “Tuurtje” Winklaar.
Un supliká ta bai na tur siudadano ku por tin informashon tokante di paradero di e dos sospechosonan aki, pa informá polis inmediatamente pa mas lihé posibel realisá nan detenshon.
Únikamente personanan ku duna informashon via di e numbernan di telefòn +5999-866-6249, +5999-866-6250 òf e liña anónimo 108 ku lo kondusí na nan aresto, por bini na remarke pa risibí e suma ariba menshoná òf parti di esaki.
Búskeda di dos sospechoso: Jainmore alias “Jay” Winklaar i Thuran alias “Tuurtje” Winklaar
