~POLIS A DAL BAHO MUNDO UN OTRO SLA DURO !! Dos Arubiano riba e boto ta deteni ~
ORANJESTAD, Aruba — Baho mundo a habri siman cu un sla duro atrobe, ora cu Polisnan Maritimo a descubri un cargacion grandi di droga, durante pleno transporte pa nos isla via lama, den vecindario di Santana di Cacho den Colony. A tuma e droga den beslag mientras cu e 2 sospechosonan ta den man di husticia, pendiente e investigacion cu a cuminsa awor.
Tabata dialuna pa 10:00am cu Polis a haya notificacion di un boto sospechoso. Di acuerdo cu e forma profesionla y strategico di atende casonan sospechoso asina, mesora Central di Polis a coordina pa manda patruya di San Nicolas pa Sero Colorado, pa maneha e situacion na tera, mientras cu a manda BP-2, e boto di Polisnan Maritimo, pa bay mesora na e sitio. Den menos di 5 minuut e boto di Polis a informa cu e ta na e sitio y a topa cu e boto cu e nomber “Porfin”.
E ekipo di Polisnan Maritimo a sigui cursonan masha pisa y extenso di con pa aborda botonan sospechoso. Pues e accion aki tabata pa pone den practica locual nan ta asina bon den dje. Asina cu Polisnan a subi riba e boto y a start cu nan control rutinario, a topa cu un cantidad considerabel di droga.
Considerando e hayazgo grandi aki, pa mas o menos 11:00am, Polis a detene dos homber Arubiano abordo di “Porfin”, kendenan awor lo mester bay duna cuenta di e droga encontra den e boto.
Polisnan Maritimo a pasa e caso y e detenidonan over pa e Departamento di Crimen Organisa cu awor lo continua cu e investigacion.
Ta importante resalta e hecho cu Polis ta conta cu e sosten y cooperacion di comunidad pa suministra informacion asina cu nota un movecion sospechoso y/of iregular. Asina por mira cu un “tip” importante awe a conduci na un accion relampago, kitando droga for di caya y garando esunnan cu ta haci nan mes culpabel na transporta y bende droga. Ta hunto so Polis y comunidad por percura pa tene nos isla mas sigur y un isla mas dushi pa biba.
A gara “Porfin” cu un cargacion di droga abordo
